شاي الكرك

السلام عليكم..                                     

نبذة عن الكرك..

هو جاي حليب... معروف عند الهنود... وكان موجود من زماااان في الامارات... وتقريبا أحسن واحد سابقا واللي بدأ بنشر الكرك هو كافتيريا اللي عالبحر،، وهو موجود في نفس موقعه من 25 سنة او أكثر..

وفي الفترة الاخيرة انتشر وااايد بين الشباب... والكل ادمن عالكرك..

ومن آداب شرب الكرك:

1/ انك توقف عند الكفتيريا وتسوي زحمه.. ((مخالفة 200 درهم))ش

2/ تطلب من السيارة وتأشر بأصابعك كم تبا... 1 أو 2 أو ..... حسب عدد اللي يايين وياك لاحياء طقوس الكرك

3/ يوم توصلك صينية الكرك ..أول شي تسويه انك تفر الريالات في الصينية... وحلاته تسمع الصوت.. 

4/ تشرب الكرك وانت تمشي في الشوارع..

5/ تفر القلاص من جامة السيارة في الشارع!!! ((مخالفة 500 درهم))ش

يعني الإجمالي بيطلع عليك 701 درهم... الريال هو سعر الكرك... وال700 هم المخالفات خخخخخخ

بس لا تحاتون... ما يهتمون وايد... وبعدين انت وشطارتك... لو شفت دورية شرطة.. خل آداب الكرك حق يوم ثاني ههههههههههههههههههه

والحين... بنبدأ المشوار الكركي...

واللي بنعرفكم فيه عالكافتيريات المشاركة..

من جي قمنا.. (انا والعضو: بوهارون،، والعضو: سقراط،، والعضو: المشاكس،، بهالجولة...

وصورنا لكم كواليس الكافتيريات.. عشان تتعرفون عليها.

1

كافتيريا رجب

مكان عجيب للكرك... أحسن كرك من وجهة نظري الشخصية..

موجود في منطقة حلوان (الآبار حاليا) في الشارجة.. وهو مفتوح من حوالي 5 سنوات

وهاي صورة للكافتيريا.. مع صور بعض الشخصيات المهمة

كواليس صناعة الكرك داخل الكفتيريا

ايجابيات رجب:

1/ كثرة الباركنات..

2/ سرعة الخدمة...

3/ المعاملة الزينة مع الزباين.. والروح المرحة في العاملين..

سلبيات رجب:

1/ يبند بسرعه.. تقريبا عالساعه 1 او 2...

2/ يفتح الصبح الساعه 9،،، يعني ما نقدر نشرب كرك وعقب نسير المدرسة.. ونفس الحال ويا اللي عندهم دوامات..

3/ الزحمة تكون كبيرة.. وبشكل غريييب... بعد صلاة المغرب... لأسباب مجهولة!!

4/ يوم العيد يبندون... وآخر عيد طاف... الشباب ساروا وشافوه مبند... ويوم سألوه اليوم الثاني. قال ان كان عندهم اجازة.. وساروا في رحلة جماعية الى (سيتي سنتر الشارقة) 

2

كافتيريا المرقاب

غني عن التعريف... اشتهر بسرعه كبيرة...

وهو فاتح من 8 سنوات تقريبا.... 6 سنوات في موقعه الجديم في منطقة المرقاب... وعقب انتقل الى منطقة ثانيه في نفس المكان تقريبا من سنتين.. ((ويعود السبب الى هالنقل... لأن موقعه الجديم كان غلط شوي... وما شي باركنات.. والناس يوقفون في الشارع... وكثرة الحوادث.. من جي انتقلوا... بس حتى الموقع اليديد... بعد مب أحسن عن الجديم بوايد... يعني مشكلة الحوادث ما انحلت نهائيا))ش

ومع صور المحل وبعض الشخصيات..

صورة ثانيه

ايجابيات المرقاب:

1/ معروف على مستوى الدولة..

2/ كثرة الزبائن.. ومستواهم العالي..

3/ الموقع الاستراتيجي..(القرب من البحر)ش

سلبيات المرقاب:

1/ قلة الباركنات...

2/ بطئ الخدمة..

3/ الحوادث ع كيفك... ومسوي زحمة في الشارع..

3

كافتيريا بن عمير

كافتيريا موجوده في عيمان... صوب بحر عيمان تقريبا..

وهي معروفة من زمان... ومشهورة بصناعة جمييييييع انواع الجاي... مب بس الكرك..

عنده فوق 50 نوع... والمجهول 99999 دووم يشرب من عنده...

وهي موجودة من أكثر من 10 سنوات..

صورة عنه.. مع الشخصيات:

2 :

ايجابيات بن عمير:

1/ النظافه والترتيب من داخل اعطيهم 10من 10

2/ الموقع في السكيك... يعني بعيد عن الشارع العام... وهالشي اللي يخلي (((المجهول وربعه يسيرون له))) خخخخ

3/ سرعة الخدمة..

سلبيات بن عمير:

1/ قلة الباركنات...

2/ الشارع سيد وروم سيد..

3/ ستايل المحل ما عيبنا... حتى اللوحه اللي مكتوب عليها اسم المحل نص ليتاته محترقة

خخخخخخخخخخخ

4

كافتيريا طنجة

أحسن كفتيريا في مشيرف... وكل ما اسير عيمان لازم اسير اشرب من عنده.. وفاتح تقرييبا (مب أكيد) من 6 سنوات... حسب المعلومات اللي يمعناها من اهالي مشيرف (عيال خالتي والمجهول) خخخخخخ

صور للمحل والشخصيات:

طريقة التحضير:

ايجابيات طنجة:

1/ كثرة الباركنات.

2/ سرعة الخدمة..

3/ الموقع المناسب بالنسبة لأهل مشيرف..

4/ الصبح يفتح من وقت... عقب الفير على طول... والساعة 7 يجهز الكيمة عنده 

سلبيات طنجة:

1/ قلاصات الكرك تعبانة..

2/ كثرة تجمعات الشباب عند المحل..

3/ يبند الساعه 10 ونص... يعني يبند من وقت...

والسبب في هالشي ان شرطة عيمان مانعتنهم من انهم يفتحون لي نص الليل... عشان الشباب ما يتيمعون يدام الكفتيريا..

5

شاي واسط

كفتيريا موجودة في منطقة سمنان في الشارجة..

تخصصه الكرك... لكنه مب اوكي فيه... وفاتح من سنة وحدة بس... يعني يديدة..

وطبعا (سقراط) يعرف زكريا عدل... من جي في بينهم نوع من المرح والدعابة.. خخخخخخخ

الفكر التسويقي العالي عندهم... يعرفون ان اهل الشارجة نصهم شرجاوية والنص الثاني شعباوية.. من جي ما زعلوا حد

ايجابيات واسط:

1/ الفكر التسويقي الراقي... بوضع اعلام الشارقة والشعب..

2/ الموقع الممتاز..

3/ النظافة الجيدة..

4/ وضع الاعلانات والاقوال المأثورة لجذب الزباين..

سلبيات واسط:

1/ الكرك ماله تعبان.. ومب شي.. للأسف يعني..

2/ عدم وجود هندي محترف لصنع الكرك..

3/ قلة الزباين... (((للأسباب المذكورة)))ش

6

كافتيريا عالبحر

موطن الكرك الأصلي... كافتيريا جديييمة فاتحة من اكثر من 25 سنه..

له تاريخ عريق,,, وكل الشياب في الشارجة يعرفونه... ووايدين يتيلسون فيه.. ومسوين لهم ميلس شعبي صوب الكفتيريا,, ولو حد طاف من عندهم يطالعونه من نعاله لي غترته... ((يعني يشردونه)) خخخخخخخخ

وصورة للكفتيريا والشخصيات العريقة اللي فيه..

يوم سألنا اسماعيل عن تاريخ الكفتيريا.. قالنا انه هو يشتغل فيها من 18 سنة... ((يعني قبل لا انا انولد)) خخخخ

وبتقدير منه هو قال انه فوق الـ25 سنة..

وبجي بيكون أعرق كفتيريا موجودة.. والاساس في انتشار الكرك بين المواطنين..

ايجابيات اللي عالبحر:

1/ يسوي جميع انواع السندويجات.. (بيض وجبن.. هامليت.. الخ.... )ش

2/ ميلس شعبي للشياب...

3/ تخصص شياب..

4/ لعب طاولة وورقة صوب الكفتيريا..

5/ الباركنات لا بأس..

6/ الجاي حلو وعجيب.. (الموطن الاصلي للكرك)ش

سلبيات اللي عالبحر:

1/ زحمة الموقع اللي هو فيه.. ((يعني صوب البحر... والسوق هناك))ش

2/ بعده عن المناطق السكنية... يعني يبالنا نضرب خط عشان الكرك لو بنسير عنده خخخخخخ

وطبعا بعد هالجولة المتعبه.. واللي لفيناها في يوم واحد..

من عقب صلاة العشا لي الساعه 11:30 فالليل تقريبا

سرنا كفتيريا (السراب) نتعشى... وطبعا ما في احلى من الديو...

لكني ما شربته!!!

تعرفون ليش.؟!!؟؟

لأننا نقعنا واحنا نشرب الكرك من كل كفتيريا...

وهاي صورة لقلاصات الكرك 

خخخخخخخخخخخخ

وطبعا غير اللي فرهم سقراط .. (عشان يكمل آداب الكرك) ش

ههههههههههههههههه

وهذا هو موتر عمليات البحث

خخخخخخ

موتر بوهارون...

وبجي تنتهي جولتنا الطويييييييييييييييييييله وااااايد

والحين أكيد تبون تعرفون منو خذ لقب:

:::..ملك الكرك..:::

عدد الأصوات

النسبة المئوية

كافتيريا رجب

23

42.59%

كافتيريا المرقاب

4

7.41%

كافتيريا بن عمير

19

35.19%

كافتيريا طنجة

3

5.56%

كافتيريا واسط

1

1.85%

الكافتيريا اللي عالبحر

4

7.41%

المشاركون في التصويت في هذا الاستبيان 54 شخص